Þeim líður ekki illa út af heimilinu mínu sem brennur í arðráni auðstéttarinnar

Ég hvet ekki til skemmdaverka. Alls ekki. En ég skil vel að fólk sé orðið reitt og búið að gefast upp á að vera rólegt. Ég finn blóðið ólga í æðum mínum og sýrustigið í maganum nálgast hættumörk vegna reiðinnar yfir ósanngirninni og óréttlætinu sem að ég hef verið beytt af stjórnvöldum.

Ríkisstjórnin er að stela af mér fasteigninni minni og bílnum mínum. Ég er búin að vinna fyrir þessari fasteign og þessum bíl hörðum höndum einstæð móðir með 7 ára gamalt barn á mínu framfæri sem er með afar viðkvæma heilsu.

Fyrir kreppu átti ég 40% í fasteigninni minni. Fyrir reiknismistök bankanna þá hefur minn hlutur á stuttum tíma rýrnað á ljóshraða á meðan hlutur lánadrottna minna sem eru í eigu ríkisins hefur vaxið á ljóshraða þannig að núna á ég minna en ekkert í því.

Það hafa bæst 10 miljónir við höfuðstólinn á litlu 90 fm íbúðinni minni, peningar sem að ég tók ekki að láni. Upphæðir sem urðu til í tölvum fyrir reiknimistök bankanna. Upphæð sem er algjört mannréttindamál að stjórnvöld leiðrétti......en þau eru að reyna með öllum leiðum að véla mig til að borga. Ég segi nú bara eins og Bjarni Ármanns; það væri fjárhagslega algjörlega óábyrgt af mér framtíðar minnar vegna og dóttur minnar að borga þessa ofgreiðslu.

 Ég mun aldrei greiða ofgreiðslurnar á lánunum mínum - þessar 10 miljónir sem stjórnvöld hafa bætt við íbúðalánin mín fyrir reiknimistök bankanna og ég tók aldrei að láni. Allar þær aðferðir stjórnvalda til hjálpar heimilunum sem lúta að lengingu lána... og að ég borgi þessar ofgreiðslur koma ekki til greina

Fjölskyldubíllinn minn kostaði um 2,5 miljónir þegar ég keypti hann. Ég var lengi að safna mér fyrir honum og gat greitt meirhlutan út í hönd, 1.710.000. Restina 790.000 tók ég að erlendu láni. Nú hefur hlutur lánadrottins míns sem er í eigu ríkissins vaxið með ljóshraða á sama tíma og minn hutur hefur rýrnað á sama hraða, þannig að ég á allt í einu ekkert í bílnum mínum.

Ég fæ ekki betur séð en að íslenska ríkið sé að ræna um hábjartan dag af mér aleigunni. Ég er með óbragð í munninum yfir þessari gagnslausu ríkisstjórn sem hefur svikið þjóð sína.

Þeir sem komu þessu ástandi af stað, fjármálaglæpamennirnir, ganga bara lausir og lifa sínum elítu lífsstíl. Þeir eiga eignir, þurfa ekki að hafa áhyggjur. Ástæðan fyrir áhyggjuleysi glæpamannanna er að rikisstjórnin gagnslausa ætlar að láta okkur fólkið, fjölskyldurnar í landinu borga tjónið með fasteignunum okkar sem að þeir færa bönkunum á silfurfati. Þeir leyfa sér þá ósvífni að leiðrétta ekki reiknimistök bankanna. Þetta er ógeðslegt óréttlæti mér er illt. Mér er illt í hjartanu og mig langar til að æla.

Þetta eru enn þó bara málningarsprengjur. Ég bjó lengi í Frakklandi og á Spáni. Frakkar væru ekki svona rólegir eins og Íslendingar. Sprengjurnar þar væru kraftmeiri en vesælar málingabombur og hvellettur. Spánverjarnir væru örugglega búnir að gera eitthvað kraftmeira en málningarsprengjur. En íslenska þjóðin sogast hægt og rólega lömuð af skelfingu í dauðateygjunum niður í feigðarósinn.

Það er búið að smána þessa þjóð. Valta yfir hana. Traðka á henni ofan í svaðið.

 

Nágrönnum auðmanna líður illa

Athugasemdir

[Katrín Linda Óskarsdóttir, 16.9.2009 kl. 19:14]

Hjartanlega sammála þér Anna Margrét. Góð færsla hjá þér. Ég er í svipaðri stöðu og er ekki sátt við hvernig farið er með eignir fólks.  Þetta er rán ...... ekki spurning

[Anna Margrét Bjarnadóttir, 16.9.2009 kl. 19:35]

Það hafa 10 miljónir bæst við höfuðstólinn á heimilislánunum mínum, peningar sem að ég hef ekki tekið að láni.

[brahim, 16.9.2009 kl. 22:20]

Sammála þér í þessum pistli þínum. Held að rán ALDARINNAR megi not um þetta alt saman.

[Nostradamus, 17.9.2009 kl. 12:07]

Íslendingar eru líka gungur. Íslenskir stjórnmálamenn, sama hvar í flokki þeir standa (haldiði virkilega að Bjarni Ben og hans hyski myndi standa sig betur??) eru lindýr sem eiga hvergi sinn líka en þeir vita sem er að íslenska þjóðin tekur hverju sem er og býður hinn vangann. Við þjáumst af þrælslund og undirgefni við  svipuna, nokkuð sem er arfur okkar eftir valdakúgun íslenskra embættismanna undir stjórn dana hér áður fyrr. Það er alveg dæmigert að hér sitja meira og minna enn að völdum, hvort sem er á þingi, í bönkum, í lífeyrissjóðum, í embættismannakerfinu, fjármálaeftirliti, seðlabanka og allstaðar sömu aumingjar og voru þar fyrir ári síðan. Dæmigert fyrir undirgefni þjóðarinnar. Hér hefur verið framið stærsti fjármálaglæpur sennilega í heimi og þjófarnir og þjónar þeirra sitja enn við kjötkatlana. Það er alveg lygilegt að hér skuli ekki vera blóðug bylting á götum úti, að ekki skuli enn vera búið að kveikja í stjórnarráðinu, þinghúsinu, heimilum gagnslausra alþingismanna (öllum 63), heimilum og bílum svokallaðra útrásarvikinga. Að kórstjóri útrásarinnar sitji enn á Bessastöðum er bara sorglegt. Að Davíð Oddsson fái að sitja í friði heima hjá sér og skrifa endurminningar sínar er algert grín. Að hér skuli vera við völd ríkisstjórn svokallaðra jafnaðarmanna er ennþá meira djók...

Djöfullinn hafi það, við erum aumingjar og eigum þetta trúlega skilið!!!!!

[Anna Margrét Bjarnadóttir, 17.9.2009 kl. 12:41]

Nostradamus, ég hef kosið Vinstri græna alveg frá því að flokkurinn var stofnaður. Ég var búin að sjá að ráð Samfylkingarinnar við vanda heimilana væru handónýt löngu fyrir kostningar. Ég var þrátt fyrir allt glöð að Vinstri grænir kæmust loksins í ríkisstjórn. Ég get ekki lýst því hvað ég hef orðið fyrir miklum vonbrigðum með þessa ríkisstjórn óréttlætis og misréttis. Mér finnst þessi ríkisstjórn hafa brotið svo á fólkinu í landinu með því að leiðrétta ekki heimilislánin að þau ættu bara að fara frá. 

[Hallur Magnússon, 17.9.2009 kl. 13:17]

Góð færsla

[Tinna Schram, 18.9.2009 kl. 01:39]

Ég er gáttuð á fyrirsögn fréttarinnar...

Ég finn sko ekki til með auðmönnum, sama hvort það séu þeir sem eru nágrannar mínir eður ei.

Ég finn til með þjóðinni okkar og einstaklingum þjóðar okkar. 

[Þorgeir Ragnarsson, 18.9.2009 kl. 10:35]

"Ég mun aldrei greiða ofgreiðslurnar á lánunum mínum - þessar 10 miljónir sem stjórnvöld hafa bætt við íbúðalánin mín fyrir reiknimistök bankanna og ég tók aldrei að láni."

Fyrir mitt leyti þá hef ég ekki áhuga á að greiða þínar skuldir. Það þýðir um leið að ég hef ekki áhuga á að verða skattlagður aukalega svo að ríkið greiði þínar skuldir.